噚日正要出街，從灣仔出發，打爆V-Power，
驟見到，紅色的拉利，震到副偈沙啞，
飆得急，連彎都劈入，將我看扁下，
其時我只三秒已過百二，錫住佢泵把。
就似這一街，曾經稱得上掃把佬天下，
但剎那，全街都Evo，我要靠架Alfa，
波箱加減轉數常在，Twin-Tur不許在面前爬，
過我的人，沒有吉士拋開嗎，被貼不需要害怕。
——改編自〈囍帖街〉
作詞：徐影龍
攝影：譚盈傑
演出：Isha@StageModels
（忘掉載過姑媽）當初的Q7車廂闊落頂呱呱，
想起Sportwagon那後座，又一再鬆軟地嘆茶，
明白從沒輸下。
雖然小妹已年過三十，兼且貴為人妻，不過一手拖波吊極力子功力，順滑明快，親戚朋友個個坐得舒服，連姨媽姑姐四大家族，都頒個金車金獎畀我。不過港人要實際，七人車、SUV大行其道，埋白講，有幾何坐滿全車人？一個人舞住兩噸車，耗油白白浪費晒喺車重度，計我話旅行車先最有經濟效益，就好似我啱啱換嘅Alfa159咁，Sportwagon五門揭背款，全車人上落容易、梳化軟熟舒服唔在講，特大尾廂，有半架農夫車尾斗咁巨，唔似縮細咗嘅迷你七人車，裝人定擺嘢只可二揀一，就算真係唔夠位，後排一樣可以摺低增加空間，搬埋屋企張梳妝枱都仲得呀。
我最怕悶，尤其係車款，最好似我老公咁有型，七人車太老實、SUV又嫌粗獷得滯，Alfa旅行車款就最Fit，車尾實際，但車頭真係型到O晒嘴；頭冚低矮斜上至擋風玻璃，家族標誌倒三角鬼面罩，再加每邊3盞超光Bi-Xenon頭燈，簡直如夜鷹出動，撲殺獵物，淨係氣勢已經值回票價。
（忘掉愛過孖叉）小Alfa波箱高轉D波又跑馬
Oneway的街景想要爆升，只要轉吓揸，
等不及加減，是嗎？
好多人喺出面唱我窮，其實佢哋誤會晒，只係我數口精，慳得就慳，就係鍾意Alfa159身為2.2L級，耗油卻低過合理水平，有次我連續由將軍澳來回赤臘角機場兩次，望吓油錶，只係跌咗一格多啲，計番條數差不多$1.4/km，莫講話慳過「祖兒」架3.5L七人車，就算同「千Fa」架日本1.5L車仔比，亦不遑多讓，但馬力卻達到185匹，就算無Turbo爆，佢哋今年都要跟喺我後面食塵，全靠Alfa個獨門Selespeed波箱。
講起個Selespeed，真係令我又愛又恨，由於骨子裏屬手動式波箱，加減轉波會幫你吊極力子，平常輕油慢揸，啪個D波已夠踩，不過遇着你心急時，踩大油、轉數一扯高，每次轉波就會猛然一頓，好似新牌仔揸棍波車跑馬仔一樣，隔籬位隨時坐到見頭暈。
其實玩Selespeed波箱，真係要當佢棍波咁揸，D波踩高轉唔係唔得，不過要識用油門控制佢升波，差唔多3,000rpm就鬆一鬆油門，再踩就Pick-up上一個波，揸起嚟會順暢得多。但我話你知，真係想踩高轉，應該轉玩加減波，只要習慣幾個波段咩轉數嚟最大扭力，再揸吓軚盤個+/-撥片嚟轉波，就可平衡到高轉馬力同順暢度，想好好駕馭Selespeed，呢一招一定要學識。
1.咪睇小我係生過仔嘅師奶，揸Alfa就係要佢棍波式嘅玩法。
2.呼應頭燈霸氣，尾燈一樣採用長條式設計，前後都咁嚇鬼。
3.尾廂夠大，擺晒BB車同一堆雜物，依然好鬆動。
4.七輻式花瓣合金軨，圓形Design卻流露硬朗氣勢。
Alfa159Sportwagon2.2JTS
引擎：2,198c.c.直四JTS
馬力：185bhp/6,500rpm
扭力：230Nm/4,500rpm
傳動：6前速半自動波箱，頭驅
售價：$364,800（Selespeed）
查詢：AlfsShowroom（28778788）