喺家陣脆弱嘅金融同經濟環境下，重新建立對市場嘅信任好緊要，市場正常運作先可以慢慢恢復番。咁點至可以重建大家嘅信心？港交所（388）主席夏佳理噚日喺亞洲金融論壇話，除咗政府、企業之外，傳媒都擔當起重要責任。
莫令負面情緒擴散
佢話有次睇美國新聞節目令佢好震驚，當時美國政府啱啱宣佈注資一家金融企業，但股價未見起色繼續跌，點知呢家傳媒幸災樂禍，仲喺度估下一次會係邊家爆煲，態度認真唔要得。佢話喺呢個非常時期傳媒仲踩多幾腳，將負面情緒擴散，值得傳媒人三思。就好似自由放任嘅金融市場，最終令美國經濟爆大鑊。
佢又話世界嘅經濟金融中心，正由西方轉往東方，亞洲喺全球貿易同投資角色越嚟越重要，話說早喺1800年代，中國係全球主要貿易同文化中心，當年景象正逐步重現。