美國候任總統奧巴馬今日宣誓就職，打破歷史成為美國首位黑人總統，佢有咁嘅成就自然有過人之處，連經濟界重量級人馬、摩根士丹利亞洲主席羅奇都大讚：「奧巴馬嘅演說，係我有生以嚟眾多政治家中最好嘅一位。」
噚日喺會展出席亞洲金融論壇嘅羅奇話，群眾對解決金融海嘯呢個深層次問題嘅期望，奧巴馬已經成功降溫──即係咪望好快搞掂；至於奧巴馬效應可以維持幾耐，就要睇佢表達嘅遠景、熱誠同影響力仲可以撐幾耐。
格老造就資產泡沫
不過，佢對另一位猛人格林斯潘就大加鞭撻。大會主持艾爾敦問佢，呢場金融海嘯為下一代帶嚟乜嘢教訓，羅奇回應話，唔好再相信格林斯潘係最好嘅中央銀行家，話格老造就咗資產泡沫，未有做好監管者嘅責任。
講開又講，特區政府噚日舉行呢個亞洲金融論壇，吸引到一啲稀客畀面出席，例如俄羅斯副總理兼財政部部長庫德林、歐洲委員會財經事務總署國際事務司長德萊塞亞等。
李華華
mailto:[email protected]