仲有一個禮拜就過年，喺美國療傷嘅劉翔，雖然呻當地冇過年氣氛，不過諗起到時美食多多就流晒口水。教練孫海平一早知弟子為食，於是日日打電話提醒佢要減肥。乜話？劉翔超重，咁第日點跨欄呀？
未過農曆年 肥咗3公斤
大家唔使緊張，劉翔未變肥翔，只不過重咗3公斤啫。本月初獨自回國嘅教練孫海平，話離開時同劉翔磅過，發現重達90公斤，比理想體重多3公斤。於是，佢喺國內日日打長途電話催促弟子減肥，真係既勞神又傷氣。孫教練同求大俠講，劉翔喺美國膳食普通，一日都係煮3到4個餸，佢仲要唔食雞肉㖭！咁都長肉都好易養啫。
又難怪劉翔，佢日日只係去醫院做康復治療，平時操練又齋練上身，相比之前日跑夜跑，𠵱家肥幾磅唔出奇。前日劉翔再收到孫教練電話，突然好開心咁話體重返番85公斤，搞到教練半信半疑。我求大俠從肥哨嘅減肥經驗分析，齋練上身兩周減3公斤難度幾高。不過最弊係新年一到，劉翔嘅體重肯定有增無減。
阿媽手勢好 實食大個胃
講起過農曆新年，劉翔話往年喺國內隊友放大假，自己就出席商業活動，根本冇時間好好休息同陪家人。今年喺美國雖然氣氛差啲，不過就少咗好多應酬，加上媽媽吉粉花煮嘢手勢了得，咩上海炒年糕、水餃呀咁，實食到唔停得口啦！當地華人亦約定劉欄王到時擦餐勁，到時孫教練又唔喺身邊，劉翔唔變肥翔先至奇啦！
好彩美國人農曆過年唔放假，劉翔亦會每日去醫院作康復治療，相信肥極都有個譜。據孫教練透露，劉翔呢個禮拜將首次喺跑步機練跑，教練仲形容係「意義重大」，因為總算開始跑番步。此外，孫教練嚟緊會帶埋「劉翔二世」謝文駿去美國，同師兄一齊訓練；一於兩師兄弟一條心，為將來挑戰羅布斯努力咁話。