電訊魔童空降亞視，其中一個大計係要增加新聞娛樂性，記者要in啲，主播要潮啲，唔好咁似中央台，可惜出師未捷就要起身，遺下改革鴻圖大計。亞視唔buy魔童嗰套，唔代表其他老闆唔鍾意，銳意改革、農曆新年後大變身嘅無綫新聞部，好似繼承咗魔童遺志，大舉出動新聞小花谷收視。
為收視接商場騷
八方早前已爆料，指TVB會將晚間新聞，由晚上11點35分提早至11點出街，比ATV晚間新聞仲要早15分鐘播出，希望搶多啲觀眾，最新消息係已落實喺二月二號星期一，即係大年初八更改播放時間。提早播新聞谷收視，據講係TVB話事人六嬸意思，新聞部高層唔想令六嬸失望，近日苦思如何令收視暴升方法，其中一招，就係為記者、主播做多啲宣傳，即係好似捧紅藝人咁，要佢哋「入屋」。
點樣捧藝人，TVB當然不假外求，請教陳總或者樂小姐就得，有個成日製作商場騷人士向八方透露，TVB三位新聞小花盤翠瑩、周嘉儀、林小珍，連同體育主播伍家謙，今個星期五年廿八，會去尖沙嘴美麗華商場幫市民寫揮春。做記者、報新聞都要好似藝人咁做商場騷，真係令人頗訝異，新世代記者真係要多才多藝先得。
TVB暫時只係要記者、主播寫揮春，日後有冇其他噱頭，使唔使登台唱歌玩遊戲不得而知，八方向TVB新聞部中人打聽，有人話幾個小花都幾緊張，佢哋平時揸慣咪，揸毛筆卻未必咁熟手，為免失禮人，所以近日秘密練兵，日日狂練寫揮春，真係用心良苦。
除咗要新聞小花曝光谷人氣爭取收視，無綫新聞另一改革係大玩互動新聞，簡而言之即係記者、主播報道時，多啲傾偈令新聞報道多啲趣味，咁做對提高收視有冇幫助，真係要播咗出街先知。新聞部有人認為如果無損新聞公信力、準確性，嘗試改善報道方式冇乜問題；亦有人指現有模式沿用多年，觀眾睇慣咗又冇投訴，唔值得貿然改革。
改革後無綫新聞會唔會好睇咗，八方唔知，不過幾個電視台新聞部谷收視呢場好戲肯定精采，無綫咁進取，亞視、有線豈會坐以待斃？
mailto:[email protected]