近期小弟推介嘅早飛唔多順，好彩戰友畢傑兄保持水準，好似上星期五大大聲提供維拉利爾[-1]，結果順利命中，今次早飛推介西班牙盃，都係問一問佢意見好。
周中4場西班牙盃8強首回合，畢傑諗都唔使諗就推介周四出擊嘅畢爾包，可主場擊敗希杭，主W穩陣，竟然同小弟心水不謀而合。睇過畢爾包主場對華倫西亞呢場直播嘅球迷，相信對呢支北部球隊嘅攻力，尤其係高空轟炸好有信心，3:2險勝近期大勇嘅華倫西亞，絕非僥倖。
希杭周圍飛腳仔軟
而且畢爾包處於中游，對爭西班牙盃有一定決心，上圈主場淘汰奧沙辛拿，洛蘭廸、韋利斯等主力均在陣，今仗更有後衞阿武列比達停賽復出。而且賽程安排亦對畢爾包有利，今仗為畢爾包連續第3場主場，之前已經連勝兩場，亦避免舟車勞頓之苦；相反希杭則要應付第3場作客；要知道希杭本身都屬北部球隊，先作客中部嘅華拉度列，周日又要作客西班牙南部嘅維爾瓦，今次又要北上，簡直係環遊成個西班牙，未開波搭車搭飛機已經腳仔軟；以佢哋已經聯賽作客4連敗頹勢，又點頂得住畢爾包嘅高空強攻。
AC冇心情友賽聽失「威」
配腳方面，周三就有多場友賽，原本德國球隊未開「咧」，佢哋友賽拍跳好正常，但漢諾威竟要搵到意甲嘅AC米蘭做對手；意甲本身已展開聯賽，AC上仗頂住小勝費倫天拿，已經浪費唔少氣力，球會又要應付卡卡離隊問題，邊有心情踢呢場太公波，一於博漢諾威贏波。文：牽牛
早飛倉
主菜：星期四4畢爾包勝（1.6）@1,000
渾水摸魚過關：星期三8漢諾威勝（待定）x星期四4畢爾包勝[-1]（2.75）2x3@200
今日早餐價錢：$1,600
上日賺蝕：+$2,100
早飛倉結餘：$97,774
規則：$100,000本錢，每日買早報最多動用$5,000，最少$1,000，逢周二、五見報。
早飛王貼士
星期四4畢爾包vs希杭
首選：畢爾包勝（1.6）
次選：畢爾包勝[-1]（2.75）
冷選：畢爾包勝3:1（12）
周中焦點
星期三1 中國vs越南
中國首場作客敗走敍利亞，在亞洲盃外圍賽出線形勢不樂觀，今仗主場面對東錦賽冠軍越南，國足能否及時復蘇？
星期三12 愛斯賓奴vs巴塞隆拿
西班牙盃8強上演巴塞隆拿市打吡戰，巴塞近期如狼似虎，上仗狂勝拉科魯尼亞5:0，上仗慘吞馬拉加4蛋的「愛奴」，猶如以卵擊石。