當旅遊記者，每逢長假前會忽然人氣急升。開MSN，熟底和不熟底紛紛投懷送抱。「旅行去邊好？」又嚟。台灣東南亞？「去過N次。」日本？「Yen貴。」歐洲囉，「冇錢去」……偏偏世界最多這些介乎有錢冇錢、想玩又唔係乜都玩的人。以下是本人08年去過最有驚喜的地方，重點是平、有嘢睇、啱胃口，你再唔啱，我offline㗎喇，好鬼忙㗎我！
記者、攝影：楊桂菲
鳴謝：港龍航空、西安君樂城堡酒店
西安BB版798
A：喂，旅記，新年我想返大陸，北京上海以外有乜推介？
我：西安。
A：兵馬俑呀？老嘢。
我：西安不知幾潮！有個798……
A：北京798個friend?
我：我會話係798嬰兒版，07年6月開幕，你會見到一個個藝術家匿喺度畫畫，而唔係顧住賣畫，而且你會感覺到佢有潛力同生命力。
A：要用幾多時間逛先？
我：佢前身係印染廠，地方大，但目前只係局部開放。我建議你去一個下午（因藝術家不是早起的動物），重點參觀西安麼藝術中心（Xi'anCenterOfMoreArt），佢係主題gallery，最近有以西安近代史做主題嘅展覽，幾精采。跟住行吓啲車間（類似工作室），會見到畫家埋頭畫畫，啱傾咪傾兩句囉。好想使錢的話，嗰度都有設計tee賣。如果鍾意影相，嗰度好raw、好亁枯、好西安。
A：又係中國modernart？睇唔明㗎喎？
我：咁要你自己睇過先知。我同負責人岳路平傾過，人哋後生細仔搞過好多國內展覽，佢話北京嘢政治啲、上海嘢時尚啲、西安嘢藝術感重啲，這同城市發展好有關係。
西安麼藝術中心（XCOMA）
地址：西安市紡織西街238號
網址： http://www.x-coma.com
高人的伊甸園
A：西安有冇BoutiqueHotel？
我：我有三間正嘢介紹。同一集團，三種風味，請記住一個地名，叫玉山；跟住一個人名，叫馬清運，人稱馬老師。
A：乜水？
我：建築師，身在紐約，心在西安。有錢，有品味，有夢想，一心想建立自己嘅伊甸園，發晒癲咁喺一個可能冇人知紅酒係乜嘅地方，投資幾百萬種葡萄釀紅酒建酒莊。
A：好浪漫呀。
我：佢係想令中國人認識西方人嘅qualityoflife，所以起多三幢酒店，每幢得幾間房，堅持唔裝電視唔放電話，仲要唔見佢宣傳喎！多數只招呼朋友同員工去住，高人一個。
A：冇電視冇電話，咪好悶？
我：又唔會喎，首先你唔好以住城市嘅標準去睇，從西安市區開車入去，要個半鐘，你睇住周圍越來越少人，越來越多山同農作物，已經恍如去咗另一個時空，令你不自覺放低平日嘅自己。
肥水不流外人田
A：三間酒店揀邊間住好？
我：擲銀仔揀一間啦，但強烈建議你去埋另外兩間參觀，反正都喺附近，畀住相你睇先啦。
A：嘩！石屋！
我：型呢！呢啲叫father'shouse，馬老師就地取材搵村民執石砌成，室內部份就全部用竹，仲有泳池，呢幢嘢攞咗建築獎㖭！可以睇埋賣飛佛先，呢個仲勁，叫井宇！成個山頭得佢一間。
A：真係酒店？中間凹入去嘅？
我：呢個係陝西房屋特色，叫「肥水不流外人田」，收集雨水最強。
A：點擺得落房？
我：就係擺得落！間間複式，有個閣樓仔係床位，最絕係馬老師用當地盛產嘅藍田玉砌間房出嚟，令到件事好有中國韻味得嚟又型。最好係夏秋時分去，可以睇到附近200畝葡萄園生長同收成，仲有日出日落時的美景。
A：好想去呀！但𠵱家播緊《珠光寶氣》，都係睇電視先，遲啲傾！
我：真係唔長進……
西安玉山葡萄酒莊園及度假村
地址：西安藍田縣玉山鎮710504
網址： http://www.jadevalley.com.cn
註：如要往井宇及father'shouse參觀，可先往酒莊聯絡辦公室人員。
出門提一提
簽證：須持有效回鄉證或回鄉卡。
查詢：28511700（中國旅行社）
套票：港龍假期西安冬季精選套票，包括西安君樂城堡大酒店3晚住宿、早餐及旅遊保險，逢星期一、五出發，$2,039起，有效期至3月27日。查詢：27476070（港龍假期）
貨幣：1港元約兌0.88元人民幣
電壓：220V，兩扁腳或內八字扁腳插頭
下周中國西安天晴，-4-8℃
