谷德昭執導、古天樂與鄭中基等主演的《家有囍事2009》在周五上映，現已60歲的黃百鳴在戲中打算約吳君如鴛鴦戲水，練六嚿腹肌上陣，一心以為君如會穿三點式赴會，豈料君如穿騎呢潛水衣，鄭中基則為電影犧牲食雞籮柚。
賀歲片《家有囍事2009》沒有了周星馳與已故的張國榮，換來鄭中基與古天樂配元老班底黃百鳴與吳君如繼續放笑彈，迎戰由劉德華與舒淇主演的賀歲片《游龍戲鳳》，由於勁敵當前，該片幾位演員也不敢怠慢，近期狂谷宣傳，連久休復出的黃百鳴都要穿着泳褲與吳君如大晒鴛鴦戲水場面，不過這場游水戲，君如密實得過份，完全沒睇頭。
密不透風好失望
戲中黃百鳴希望與君如發展進一步感情，力邀她去暢泳，以為可以大飽眼福，殊不知君如個性保守，竟穿上密不透風的紫色潛水衣再加七彩泳帽應約，令他大失所望。百鳴笑說：「睇劇本知道有場游水戲，諗住做演員都要有道德，冇理由新正頭畀啲豬腩肉觀眾睇㗎，咪用咗幾個月時間去做運動，希望以最型一面示人！點知練完六嚿腹肌，依然俾君如嗰身造型搶晒鏡，不過君如真係好專業，以佢𠵱家嘅身份都仲肯着啲咁誇張嘅戲服，所以輸畀佢都係心服口服！」
八隻雞翼塞滿口
見兩位前輩如此賣力，古天樂與鄭中基（Ronald）兩後輩也不敢鬆懈，古仔更着上背心短打在床上翻來覆去，劇情講述平時浪漫不羈的戀愛專家古仔遇上心儀女孩沈麗君，即變得心如鹿撞手足無措，要朋友Ronald獻計才敢向女方表白。因幫朋友受虐的Ronald就慘被大家塞了八隻雞翼及雞屁股入口，還要一邊說冗長對白，難度真高。
撰文：葉雪