港府同貿發局噚日主辦嘅亞洲金融論壇，今年係第2屆，但出席嘅北大人高官，星光熠熠程度就唔及上屆，華華依稀記得，當時仲有人行行長周小川蒞臨。
今屆論壇由特首煲呔曾主持開幕，不過，噚日朝早原本擔任主講嘉賓之一嘅金管局總裁任志剛，就突然唔見咗人，原來佢老哥一朝早飛咗去北京，同佢老友周小川有密偈傾，聽聞係關於兩地央行貨幣互換協議安排，可能就嚟埋門正式簽約。
所謂互換（swap）協議，主要目的係為咗穩定市場流動性，人行之前已經同韓國訂立咗呢類安排，當對方有需要時，雙方可以按本幣（即係人民幣同埋韓圜），互相提供流動資金畀對方。