維園年宵今日開鑼，唔少政團搶閘開檔，支聯會主席華叔下晝3點恭候，幫市民寫揮春，今年仲有新拍檔，漫畫家尊子都會現身，不過唔係畫漫畫賀年，都係寫揮春，至於佢手字係咪同漫畫一樣咁高水準，大家今日可以去睇睇。
葉劉吉時開檔剪綵
撞時間同樣下晝3點開幕嘅仲有匯賢智庫攤位，人人都揀呢個時間開檔，唔通係吉時辰？果然係！八方聽聞匯賢主席葉劉情商大師蔡伯勵擇吉時，大師屈指一算，話今日下晝3點開檔大吉大利，葉劉聽足話喺吉時剪綵。葉劉今年繼續幫市民寫揮春，仲兼賣各式文儀用品，又因應經濟下滑而減價，上年賣20蚊嘅紙巾盒今年海嘯價賣18蚊。
公民黨幾位大狀都篤信玄學，則揀今日中午12點開檔，佢哋提倡綠色新政，所以售賣物品都以環保為題，包括再造筆、再造紙記事簿等，黨內人士強調呢啲係以垃圾循環再造嘅物品，唔係垃圾。社民連年宵亦喺今日開檔，今年主打「蕉」形精品。民建聯同民主黨兩大黨唔飲頭啖湯，民建聯搵孫公22號剪綵，民主黨就由主席何俊仁主禮，貪佢被扑頭都冇事，正一福頭喎。