煲呔一聲令下，好多敏感政策暫緩出台，高官無事忙各自搵節目，政務司司長唐英年負責招呼四川地震受災小學生，四個小學生噚日去中學同學生交流，唐英年指呢幾個學生，每個人都有難忘同感人經歷，地震令佢哋家園破碎，不過冇影響佢哋奮鬥積極嘅學習精神，值得驕傲。
幾個小學生逆境求存精神，唔知對香港學生有幾多啓發，唐英年話希望香港嘅年輕人，面對逆境時都會自強不息、永不言敗。本港學生則送上自己編織嘅頸巾同心意卡畀四個四川學生。一班四川小童，由災區嚟到香港，今日會參觀立法會，四川省政府外事辦公室主任崔志偉話，好感謝香港人援助災區，相信四川省同胞會盡快重建家園。