上世紀中國美女排球手孫玥（圖）想生個香港B！05年退居為江蘇排球隊教練嘅孫玥，喺南京大學修讀新聞系課程，近幾年甚少作激烈競技。不過佢將會為江蘇披甲，出征年尾嘅全運會。而喺全運會完咗後，孫玥同江蘇排球隊嘅合約就會屆滿，由於多年嚟為比賽喺外面奔波，36歲嘅佢亦明白到時間唔等人，所以考慮賽後搬到香港同丈夫何國文團聚，生番個BB。