三級遊戲衝擊香港PCGame界！講緊係呢隻18禁《神泣限制版》，你可以斬斬斬、殺殺殺升Lv，間唔中仲會見到啲着好少衫嘅敵人，撩你隻揪；去到賭場玩兩手，贏咗電腦荷官仲會獎你飽餐眼福，加上人設夠靚女，一定玩到熱血沸騰。搵Freeze做代言人真係啱晒，點解？因為大家都係假㗎囉，打機，千祈咪認真。
文：㩒釘華
打怪升Lv露兩手
講正式喺香港推出嘅18禁遊戲，第一隻係《古惑仔Online》，黑幫加暴力；今次呢隻《神泣限制版》就由香港GameOne代理、韓國SONOKONG製作，色情、血腥、暴力集於一身。家長們老師們咪鬧住，話明18禁，呢隻Game只限18歲以上人士遊玩，唔係畀你啲學生、仔女玩，係畀你哋玩㗎！
今次限制版盡量將呢隻韓國Game原汁原味搬嚟香港，一樣係打怪升Level嘅OnlineGame，不過打鬥場面就暴力血腥，堪稱屍橫遍野，而且角色設計就比較大膽，可以好性感，讓我坦蕩蕩。所以，廠方亦勸喻有心臟病者都咪玩，以免充血上頭。
賭大細好鬼曳
我跟你條裙、再SideBet你件外套！《神》喺賭場大灑鹽花，除打打殺殺，只要用遊戲幣，你個角色就可以進入賭場玩兩手；賭注係乜？你啲遊戲幣之餘，只要贏咗NPC荷官，靚女就會越着越少跳脫衣舞，贏到盡可以點？乖嘅小朋友唔好理，大朋友就自己發掘喇，總之就可以為所欲為啦；嗱！呢一刻都算係歷史性時刻喇，香港終於有隻打正旗號鹹鹹哋嘅Game，唔使下下唔識日文又要玩人哋啲HGame啦。
多重難度死咪死
唔好以為《神》只係掛羊頭，其實佢唔只賣狗肉，喺遊戲系統度都花過心思。遊戲中玩家可以從體驗、普通、困難及死亡四個難度下自由創作角色，最搞鬼係難度越高你創作嘅角色就會越強。
死亡模式下最勁，不過代價就係角色一旦死亡，將無法輕易復活，角色資料仲隨時會被徹底刪除，即係儲咗幾多Level會無晒，係呀！唔搏邊有摩托呀？
售價：$10
內附遊戲安裝光碟、遊戲點數30點、抽獎道具號碼。
查詢：GameOne（28660018）
