旅發局被揭發大花筒後，負面新聞無日無之，都唔知係風水唔好定流年不利，主席田北俊噚日出席立法會會議，介紹旅發局09年工作大計，有議員指旅發局沿用多年嘅帆船標誌，既老土又唔配合香港形象，因為香港都冇晒呢啲中式帆船，建議旅發局改新徽號。
田少可能唔想俾人拆招牌，指煲呔日夜跟身個香港飛龍標誌，起用之初都引起好多爭議，結果都一用多年，不過佢費事議員糾纏，所以好行貨咁答話會考慮更改，總之諗吓啦。會上葉劉關心海洋公園動物情況，指好多市民都想殺人鯨表演，希望政府買番條。呢排海洋公園當黑，前後養死三條中華鱘，八方建議暫時唔好再養殺人鯨，費事又多一條寃魂。