有時候，情侶去旅行好難兩全其美。去馬爾代夫私人小島係好，但不少港人都話對住個海，頭兩日好浪漫，第三、四日就悶到癲！翻版金城武帶常盤貴子來到峇里ClubMed，貴子即問：「吓？這個島主打一家大細，會唔會好嘈㗎！」金城武衰衰哋細聲說：「細聲啲啦，我哋躲入教堂咪得囉！」
記者、攝影：陳慧敏
鳴謝：ClubMed、國泰航空
入教堂做Spa
知道貴子鍾意做Spa，金城武帶了她去全新的Sparelax，今次ClubMed與知名品牌MandaraSpa合作，Mandara即是「長生不老」意思，星級飯店如W、Hilton等都有它坐鎮。Spa大堂用安靜的石子做主題，散落的巨型石子是布做的顆粒，砌成大大小小的梳化，很安靜、舒服。還在趕工的峇里神廟後有三座雙人按摩小茅屋，噢，奉神之名，象徵了這裏不是個喧嘩之地。推門，兩層樓高的黃色大玻璃讓陽光灑進，照得滿地金黃，居然像關島的海邊小教堂。小兩口做完Spa，在房內嘆杯茶泡泡花瓣浴，浪漫吧！
大人細路各自精采
不只情侶，小家庭來到都一樣可以盡興。出門常有的左一抽奶粉右一袋尿布，湊住個B仲要推架BB車的混亂情況，在這裏，不再是問題！阿仔有阿仔的PattiClub小天地，見到大堆小朋友在草地上玩紅綠燈，跟G.O.（活動策劃員）靚姐姐上堂學做小丑，或跟大哥哥學做空中飛人，媽媽你哋自己玩啦，我唔得閒呀！
好多去過ClubMed的旅遊記者，都曾經諗過辭工，投身可玩足全日的G.O.行列。每日帶隊教人玩風帆、滑浪、水上電單車，上岸做空中飛人、玩池邊遊戲、打高爾夫球等，夜晚又着靚靚參加party同上台表演，生活多麼精采！但大家最後都做番老本行，原來這裏實在太多嘢玩，由早上八點玩到凌晨兩點，仲點會有精力去篤波飲嘢？玩一日我都跟唔掂，何況日日如是！我都係做個按時間表去玩，累了伸手拿免費飲品的住客算了。
跳舞跳天光
浪漫夠了，想熱鬧，全村都有氣氛。12月19日才重新開幕的ClubMed，今次請了專門設計高級酒店的MarcHertrich，他曾幫手整了個六叉（三叉囗是ClubMed的標誌）級毛里裘斯超高級度假村，今次一落筆就搬咗隻UFO去沙灘邊草地，方便360°全景看勻整個村子。熱辣辣的天氣，無論人在餐廳、泳池，還是剛滑完浪玩完風帆精疲力盡爬上岸，每次只要走上UFO指住個鼻（其實要出示住客手帶），就可以免費來杯cocktail，不夠喉再來杯朱古力奶昔溝雪糕，甚至香檳紅酒白酒等（除貴價酒外全部免費）都得。如果小情侶想盡情玩個飽，可在夜晚睇完G.O.們自導自演的空中飛人show後，同全村人一齊湧去UFO跳舞，點杯雞尾酒飲兩啖又繼續大叫，藉住酒精力量又再high一點。主持人還跳到上吧枱，攞住個咪宣佈：「有力的人，凌晨2點同清晨5點都有沙灘party，頂得順就繼續啦！」
另外，新餐廳有4個不同的東方色彩主題：滿天油紙遮的陽傘區、幾條巨龍捲來捲去的祥龍區，清新藍白色的蘭花區及簡約的盡善盡美區。峇里島是個馬騮島，但不會有大批馬騮同你搶食，反而有好多小松鼠，不時閃落餐廳等客人餵麵包，好可愛。
出門提一提
簽證：持BNO須簽證，特區護照免簽證。查詢：28904421（印尼領事館）
套票：由2月1日至3月31日期間，入住ClubMed峇里島度假村可享半價優惠，5日4夜全包假期連國泰航空機票，成人每位$7,800起。查詢： http://www.clubmed.com.hk
貨幣：1港元約兌1,427印尼盾（文中價錢已折算港幣）
電壓：230V，兩圓腳或三扁腳插座
旅遊查詢： http://www.balitourismboard.org/
下周印尼 峇里
間中有雨，22-32℃
