煲呔日前宣佈押後政改諮詢，自由黨主席劉健儀即時公開表示失望，但據講佢嘅兩位黨友方剛同張宇人唔係咁睇，認為首要搞好經濟，政改諮詢遲啲冇乜所謂，搞到劉主席都要改口，轉軚話理解煲呔嘅決定。其實，又唔怪得方剛，佢旗下公司今個月份嘅糧都要押後出，方生仲好似煲呔咁大條道理，話薪金同雙糧分開出，因為唔想員工一次過用晒份糧，同煲呔一樣，歪理連篇。
方剛過完年先至出糧
方剛間ToppyLimited（HK）旗下有唔少時裝名牌，有員工同八方呻，早幾日收到主管通知，今年雙糧會喺今個月23號即係年廿八嗰日發放，但1月份嘅薪金就要等到2月4日，即年初十先有。員工話公司一向喺月底出糧，今次出遲幾日搞到好多員工牙痛咁聲，最㷫係以往公司通常會將1月份薪金連同雙糧安排喺同一日發放，等員工過番個肥年，點知今年分開出，員工過年都要慳啲使。
方剛早前帶頭推動不裁員約章，但員工話就算公司唔裁員，遲出糧都係唔應該。根據勞工法例，冇遲過糧期超過七日出糧就唔係違法，但新年流流，好多打工仔都急需銀両過節，1月又係交稅季節，方剛今次hold住員工筆血汗錢，變相打擊香港消費市道，零售業同行真係多得佢唔少。
不過，方剛解釋其實佢咁做係用心良苦，將1月份糧同雙糧分開發放，原因係唔想員工收到錢之後一次過花光晒。佢又澄清，會計部係安排2月2日發薪，並非員工所指嘅2月4日，因之前幾日係新年假期，冇人辦公，因此安排唔到喺1月底出糧。
田二少不裁員有限制
八方聽完方剛嘅解釋，都覺得好好笑，份糧係員工嘅，鍾意點使唔使你方老闆粗心，不如速速磅，唔好兩頭望。不過，老闆三個口，特別多辯駁。好似同屬自由黨又係老闆嘅田二少噚日上有線節目，講清楚話個不裁員約章其實只保障固定合約僱員，唔包part-time員工。主持節目嘅平叔聽到都有啲意外，即場笑咗出嚟，仲叫打工仔一定要問清楚老闆至好。田二少就話，的確有員工問過佢呢件事，又話佢啲員工都知個約章唔包括兼職喎。
mailto:[email protected]