澳洲網球公開賽今朝揭幕，各位祖國同胞除咗關心四川姑娘鄭潔有冇好表現，大家仲可以留意多樣嘢，就係世界女子網球一姐積高域嘅全身衣着，事關安踏體育（2020）啱啱簽咗佢做代言人，今次一姐出戰澳網嘅比賽球鞋同服裝，講明係集結安踏最頂尖設計研發力量，仲係夥拍美、日設計師度身訂做㖭。
芳齡23歲嘅積高域雖然貴為網壇一姐，但最大遺憾係出道至今都未嘗稱霸大滿貫，舊年都係憑住「密食」4個巡迴賽錦標，先至登上年終世界排名第一。
若果今次着住安踏產品攞到四大滿貫之一嘅澳網冠軍，除咗一姐高興外，安踏仲可以趁機揚威海外，為民族品牌吐氣揚眉。之不過，積高域月初來港參加表演賽嘅時候染病發燒，唔知有冇影響佢嘅備戰狀態呢？