劉嘉玲同梁朝偉自舊年底結婚後，稍作休息就即刻投入工作搵真銀。日前嘉玲到中環為即將出席嘅活動挑選戰衣，百忙中仲同埋媽咪一起行街，認真孝順。不過素顏上陣嘅嘉玲一見記者就戴上墨鏡閃避，反而劉媽媽大方任影。
上星期五（16號）約下晝5點，出名孝順嘅嘉玲一身便裝同素顏現身，佢喺助手陪同下，同埋媽媽到位於中環置地嘅名店Gucci揀衫。現場所見，嘉玲揀靚衫時十分細心，相當投入，身旁嘅公關公司高層Peter不時拿起新款披肩畀嘉玲睇，佢哋攞住啲靚衫講到眉飛色舞，劉媽媽就企喺身邊幫眼。
搞到滾水淥腳
其後嘉玲發現有記者喺店外影相，即刻走到店內其他位置閃避，店員就喺櫥窗前以身體阻擋鏡頭，相反劉媽媽大方任影唔嬲。
約15分鐘後，嘉玲助手率先步出，Peter就攞住相信係嘉玲揀中嘅靚衫，陪同嘉玲到門外等車，但因為保母車未到，嘉玲一度返入店內等候，直至保母車到場後，佢先擒擒青上車，劉媽媽亦緊隨其後。Peter事後向記者話：「因為嚟緊嘉玲有工作要搵衫，其實冇乜嘢特別，但就搞到佢滾水淥腳。」又難怪嘉玲雞咁腳走，佢化妝前後個樣又確係判若兩人！