三位讀者來函，請左丁山回應，其一係讀者Ｒ話買澳洲襪給父親日常穿着，希望能紓緩小腿靜脈曲張。讀者Ｒ即將到澳洲一遊，問定牌子型號先。好抱歉，左丁山幾年前確係寫過，但事隔太久，牌子已不復記憶，剪貼簿又已入倉，一時之間搵唔到，故此難以回答。讀者Ｒ不如到咗雪梨之後，到最大嗰間百貨公司問吓。
讀者Ｃ問最近《蘋果日報》報道市面上最便宜嘅按揭利率係（一）全期HIBOR+0.7，上限係P-2，（二）首三年HIBOR+0，其後HIBOR+0.17，上限係P-1.75。問抵唔抵，冇錯，按揭貸款可以低到一個月HIBOR+0，確實匪夷所思，前輩銀行家無法想像，有錢有膽買樓而用咁嘅利率借到錢，認真冇得彈。當然，大家要睇香港銀行同業拆息率將來嘅走勢如何，如果一個月利率升到三厘左右，借款人就冇乜得益，照睇全球進入一個減息周期，接近零息狀態，左丁山認為一至兩年內，HIBOR唔會高得去邊，三年後就難講，博博吓嘅啫，如果（一）按揭貸款銀碼較大（相對於自己入息而言），（二）希望三年後會升職加薪嘅，咁就選擇這個計劃，計劃一與計劃二冇大分別，起碼頭兩年可以畀息少啲！
讀者Ｌ女士來電郵話睇咗一月十六日本欄講「埋怨母校係中中」，深有同感，感同身受。讀者Ｌ出身中文中學，入到工業學院交功課（英文），就畀老師在考卷上批示improveyourEnglish，令佢覺得羞愧，於是修讀兩科英語，晚上到香港理工學院再讀一科英語，自工業學院畢業後，就到美國讀大學，畢業拿到cumlaude榮譽（約相等於本港大學之二級榮譽甲等），現在已有兩個碩士學位。讀者Ｌ話自中文中學畢業，有學習上嘅好處，至於讀好啲英文，入大學後能夠苦心鑽營，一樣可以追得上，不必自怨自艾。左丁山認為讀者Ｌ女士態度正確，讀好英文，其實唔係咁難，逼自己多睇英文雜誌、英文書，多睇英文電視台（如CNN、BBC、FOX、CNBC），兩年內必有收穫，千祈唔好聽「英文書不可中文教」此類胡說。