國美（493）噚日發通告，指11月出事嘅主席黃光裕終於「認為（自己）辭去本公司董事職務符合本公司及本公司股東之最佳利益」，所以由1月16日「自動終止作為本集團主席之身份」，個位由行政總裁陳曉接替。點解出事咁耐至交棒呢？華華喺個通告內睇到一樣嘢，唔知啱唔啱，同大家分享吓。
華華認為，真正原因係黃光裕等緊一個人，佢就係魏秋立，點解咁講？事關雖然通告話「公司管理團隊在陳曉領導下保持穩定」，但已失去自由嘅黃光裕似乎唔多放心，喺佢心目中，集團常務副總裁王俊洲，同埋負責組織規劃及人事嘅魏秋立，至係佢信得過嘅人。兩人原先同時喺08年9月1日獲委為執董，但魏因技術問題，個委任要到今年1月16日至生效，同日黃光裕辭職，仲委任王、魏做佢嘅聯合代表，「就其私人集團按董事會指示簽立有關文件」。
照咁睇，國美要引入新股東，睇怕仲要黃光裕先點頭。