灣仔合和二期發展項目一波三折，繼高度有礙景觀惹起不滿後，項目建議興建一條接駁堅尼地道嘅行車天橋，又引起居民強烈反對，認為日後會阻礙消防車嘅救援工作。班灣仔街坊噚日舉行居民大會，原本邀請發展局同多個政府部門出席，但各部門統一口徑，表明聽日去灣仔區議會聽地區代表意見，現階段唔見班居民。
今次反對合和二期嘅仲包括中巴顏氏家族後人，已故巴士大王顏成坤嘅公子顏亨利噚日出席居民大會，公開批評條行人天橋會帶來潛在危險，更重要嘅係阻礙顏氏大宅嘅重建計劃。但一向低調嘅佢只係匆匆講咗幾句意見，對記者嘅進一步提問就一概耍手擰頭，唔肯講多句。