夫妻緣盡離婚，本來係平常事，但NBA熱火後衞獲廸個老婆施奧禾恩（Siohvaughn），向法庭提交嘅離婚法律文件，就驚爆原來呢個明星球員，唔單止係唔顧兩個仔同通姦呢啲衰嘢，最大鑊係令施奧禾恩感染性病！獲廸嘅好爸爸、好丈夫、好男人形象，隨時一鋪清袋！
比較香港衰男人代表陳生同倪生，施奧禾恩對獲廸嘅指控，似乎係「蚊髀」同「牛髀」。獲廸同施奧禾恩係青梅竹馬小情人，兩人02年5月結婚，婚姻大約維持咗6年，上年5月獲廸就提出離婚；之後施奧禾恩就帶住7歲同1歲嘅囝囝由邁亞密返芝加哥生活。
遭前妻指傳染性病
據邁亞密通訊報報道，喺施奧禾恩嘅法律文件中指出，佢哋一家三口搬返芝加哥之後，獲廸不單冇喺金錢上支持，更加冇探過兩個仔；施奧禾恩苦笑話，細仔已經唔記得老竇係咩樣。施奧禾恩越爆越高興，仲話喺07年秋天，自己竟然染上性病，雖然未嚴重到染上愛滋或致命性病，但已遭受「身體、情感及精神嚴重傷害」。
呢位27歲嘅失婚婦人，更要求獲廸公開結婚呢6年嚟嘅性伴侶名單；聽聞獲廸同美國娛樂圈一直有連繫，到時名單一爆，隨時轟動過舊年香港淫照個名單。
天使魔鬼混合體？
獲廸代表律師就強烈否認施奧禾恩嘅指控。鬼咩！如果認咗，到時起碼分佢當事人一半身家，以獲廸喺熱火超過1,400萬美元（約1.1億港元）年薪，加上其他大公司贊助，贍養費肯定唔少嘢。
不過我求大俠都對呢單嘢半信半疑，起碼上年美國夢幻隊喺京奧前去澳門集訓，勒邦占士同安東尼等夜蒲「了解」馬交夜生活，獲廸都冇去；而且佢之前仲大拿拿畀咗200萬美元阿媽搞教堂啦……，到底獲廸係天使定魔鬼呢？