花旗國經濟重創，企業裁員無日無之，高層都要減薪cut花紅自保，但廸士尼行政總裁艾格舊年人工連花紅加咗11%，𢭃3060萬銀美金（約2.4億港銀），仲高過傳媒大亨梅鐸一成，成為跌市奇葩。
金融海嘯下，廸士尼舊年股價急挫近三成，第四季盈利更倒退13%，但艾格仍穩袋3060萬美金，當中包括基本薪金、股票獎賞同埋花紅。身為新聞集團老闆嘅梅鐸，舊年人工連花紅都只係2750萬美金，比起米老鼠老總仲差一成，證明廸士尼幾咁體恤高層。
米老鼠財政大臣斯塔格斯，舊年薪酬連花紅亦微升1.7%，𢭃920萬美金（7176萬港銀），當中人工佔119萬美金，股票獎勵同花紅則各收283萬同410萬美金。