好多理財專家都會叫人模仿企業，為自己做一份損益表，記低每個月嘅開支同收入，以達至收支平衡為大前提。如果支出大過收入，就喺支出度睇吓邊瓣使大咗，由根本度入手開源節流。
個人理財＝做生意
其實每個人都需要理財，要好好理財，就要識做生意，即使你只係一個打工仔，都要識得管理自己盤生意。就以損益表為例，一家企業嘅收入就係佢做咗幾多生意，至於個人層面當然就係每月薪金。講開收入呢個問題，敏妮即刻聯想到嘅係身邊好多朋友，喺減薪潮下難逃一劫，部份人嘅反應係好不滿，當然切膚之痛，呢點感同身受，但亦都有好大一部份係泰然接受。
可能敏妮認識嘅好多係財經金融圈嘅人，即使係打工仔，但佢哋好了解商業社會「殘酷」嘅運作方式，就好似啲電視劇嘅老套對白，商業社會任何人或者物都有個價，呢個價嘅釐訂同好多嘢有關，其中敏妮相信最重要係供求。物以罕為貴，喺金融海嘯下，金融界被裁嘅精英何其多，供應增加，價錢自然跌。
時刻保持競爭力
咁講似乎好消極，不如好似光頭仔咁正面啲睇，又係一買一賣，打工仔提供服務，換取薪酬，你公司原本願意用某個價錢同你買，家陣佢見經濟差咗，還你一個價。換轉好景時，可能有另一個老闆願意出更高價買你嘅服務。
經濟周期有起有跌，面對逆境最緊要係保持自己嘅競爭力，千祈咪因為唔開心嘅消息，影響自己嘅專業表現。
溫敏妮
http://wanmanli.com/blogs/