十五位四川地震災民同救援人員應邀訪港，噚日去咗海洋公園玩。團員之一嘅王倩喺地震後被困瓦礫96小時，佢當時嘅男朋友代劍君一直陪伴左右，不離不棄。王倩獲救後，雖然失去咗右腳，𠵱家出入都要靠輪椅，但兩小口子患難見真情，去年底仲結埋婚。王倩笑言，佢同老公之間除咗愛情關係，經此一役，已經成為「生死之交」，會一直相伴繼續走人生路。
佢哋話，當今次嚟香港係蜜月旅行。代劍君仲話，想同老婆去好多地方，相信佢總有一日會企番起身。睇見兩人鶼鰈情深，八方真係非常感動。有受災嘅小朋友同啲海豚玩得好開心，八方希望今次香港之行，能夠幫佢哋將啲唔開心拋諸腦後。