西貢墟嘅天后關帝古廟經過兩年重修，噚日舉行開光慶典，民政事務局局長曾德成同鄉議局主席劉皇發都有出席。唔少村民盛讚古廟重修後又新又靚，仲話使咗咁多錢都值得。雖然冇人講到用咗幾多銀両，但單係古廟重修委員會會長林東福就捐咗50萬，加上海外捐款同「一瓦一願」募捐行動，條數應該唔細。
呢間古廟供奉天后娘娘同關二哥，因為歷史悠久，幾條木樑生蟲，牆身壁畫剝落，所以要重修。𠵱家煥然一新，德成局長都忍唔住參觀吓，仲特別欣賞對門神。大會又搞咗個千人盆菜宴，筵開100席畀班村民同鄉紳官員擦餐飽。露天食盆菜雖然幾有風味，但噚日天氣回暖，中午唔少公公婆婆擔晒遮嚟食，都食到汗流浹背，有位太太仲中途頂唔順暈低，要call白車入院，好彩冇乜大礙。