投資專家說，當人人恐懼的時侯，就是入市的時刻。當人人興奮入市時，就是出貨甩身的時侯。那末，到底現在有幾多投資專家入了五號仔滙豐？入了幾多手？可以交代嗎？
投資專家幾叻都假，講到口水亁，卻唔及大行一致唱淡攞膽。投資專家地位不如大行，解救經濟，點解曾特首唔搵大摩做任志剛和曾財爺個位？到時一齊封嘴，獨沽一味唱好谷行恒指，做台好戲。富貴如浮雲，人造浮雲更需要搵人托住。
就算無藝術修養都知，大摩和高盛的「唱功」，勁過梅蘭芳好多！大行唱衰滙豐不遂，離目標股價還有距離，遲早會再落重藥，宣告「滙豐已死！」
跟股票談情的人慘了，明明想天長地久地擁有對方，但經大行這個「第三者」一唱，信心開始崩潰，掟貨如掟煲。掟完例牌發現，心思思唔捨得，追貨莫及。
曾蔭權開口令自己民望插水，大摩一唱令恒指仆直，誰的影響力大些？胡溫可不是盲丙！下屆特首人選扑定槌矣。