押後政改諮詢之後，煲呔似乎甚有興致，噚日走到去元朗「勝利牛丸」食嘢，點知一班爭取廣深港高鐵喺新界西設中轉站嘅街坊同區議員黃偉賢等人聞風趕至，想入去遞信。請願街坊向八方報料，話煲呔當時擺晒款咁話：「等我食完麵出嚟。」香港人向來係順民，咁一行十幾個街坊（最細嘅7歲、最老嘅75歲）咪企喺門口，恭候煲呔食完嘢兼撩埋牙先出嚟囉。
等咗10至15分鐘，煲呔急步行出嚟。請願街坊高小姐形容，只見煲呔當時閃電上車，佢咪即刻上前遞信囉，點知煲呔好唔耐煩咁話：「攞嚟啦！攞嚟啦！」但對眼尾睄都唔睄吓佢，亦冇伸手出嚟接。
有人請願即極速閃
高小姐話，煲呔保鑣用手推咗佢心口一下，混亂中佢仲跪咗喺特首架車隔籬，求佢收信，幾個街坊又攔喺車頭話：「我哋唔係賊，係良好市民，嚟訴吓苦況啫。」煲呔見咁形勢，先校低玻璃窗，聽咗佢哋講兩秒就走人。八方都想問吓特首辦，係咪冇傳媒喺度，煲呔連騷都費事做？特首辦晚上回應話，煲呔唔係唔收信，亦收咗區議員遞畀佢嘅單張同資料，當時又顧及咗請願人士嘅安全，但始終都要離去。