單仲偕唔做議員，據講民主黨少咗個經濟專家，好彩佢哋有自知之明，不恥下問，張文光同八方講，民主黨向財爺提交下年度預算案建議前曾求教經濟學家，當中包括《信報》主筆練乙錚。
練乙錚係張文光中學老師，唔介意再指點學生，張文光形容練乙錚醒咗條絕世好橋畀民主黨，幫助中產度過經濟難關。建議係咁，政府可借錢畀中產解決因裁員、減薪而手緊嘅燃眉之急，中產交稅多年，庫房喺佢哋有急需時開倉好合理，一旦佢哋搵到工，有收入時，就連本帶息喺稅單中償還貸款，由於中產人士點都要交稅，相信呢個方法唔會出現大批爛賬。張文光認為呢條橋可行，直接幫到中產，至於財爺是否接受，預算案公佈之日揭盅。