轆Book：桃花運揸返屋企

農曆新年將至，識花之人，買花唔想去花市同人逼，梗係揸車入花場自己揀。又如果車都可以即時揀，梗係揀部尾廂夠大的MPV，話晒實用，載棵桃花返屋企都得。

記者：梁美甜
攝影：王文忠
模特兒：Zoie、希（TheGroup）
鳴謝：佳記花園（27927440）

實用MPV陪掃桃花

最多人喺新年買年花，趁有部實用MPVSerena揸手，皮椅防水又有個超大尾廂，加埋電動尾門，雙手幾唔得閒都唔怕閂唔到門，仲唔乘機走轉西貢，掃番批靚年花。今年天氣時冷時熱，熱門年花桃花唔係早就開咗就係遲遲都唔開，質素都較以往差，但，買開桃花嘅人總要繼續買，希望桃花繼續旺，農場老闆李生仲醒幾招開花法過大家。

■MPV至實用，掃年貨年花單係尾廂已足夠。

■擺滿尾廂，坐多幾個人都仲得。

運花有法

李生教路，揀花要訣一：葉要青綠；二係枝幹要夠挺，表示植物夠壯。若然有花就睇埋花邊有無黑邊或好似燶咗咁，代表盆花過時，唔健康又或者命不久矣！

■有電尾門，閂門都瀟灑過人。

■花頭入車廂先，以防尾門撞傷或壓親花蕾。

■削出傷口後，以濕毛巾包住再以裝咗水嘅膠袋綁實。

■用透明膠布將桃花包住，以防整傷花蕾又可以繼續吸收陽光。

高人指路

花場位於西貢大涌口路入面，由九龍入，沿西貢公路行，經過白沙灣碼頭之後大約五分鐘路程，喺左手邊見大涌口路路牌，成段路有幾間花圃，有心人大可慢慢揀！

■由西貢公路轉入大涌路口即到。

■整段路有好幾間花圃。

■咪心急，慢慢揀至可以搵到心水靚年花。

年花開燦爛

今年桃花唔算特別好，之不過有幾款年花就搶住爭艷，好似話菊花、水仙、五代同堂、蘭花、大桔同日本海棠咁，李生仲特別栽種蟹爪菊，加埋整到成盆藝術品咁嘅五代同堂，又靚又好意頭，至啱媽媽級人馬。個人心水係靚靚蘭花同日本海棠，一盆15支蘭花售$1,200，高質素都唔使一嚿水一支，筍！日本海棠其實係紅色梅花，梅花霉花，唔好聽，於是取名日本海棠，即時高貴優雅得多，鮮紅色，搶眼而奪目。

■五、六呎高嘅大桔，啲桔真係好大，大過拳頭，由$480至$1,000不等。

■五代同堂，$150起。

■玫瑰海棠，$38起，葉嫩花邊靚。

■蟹爪菊，$80。

■六棵蟹爪水仙，
$250。

■十五株蘭花嘅一帆風順，$1,200。

規格

引擎：1,997c.c.直四
馬力：137ps/5,200rpm
扭力：20.4kgm/4,400rpm
傳動：CVT無段變速，前驅
查詢：合誠汽車（23688235）