發仔去世，相熟傳媒人英年早逝，左丁山不禁神傷。據公關大姐大通知，發仔遺體已移往香港殯儀館，訂於明天（一月十九日）下午五時至十時以佛教儀式公祭，一月二十日星期二上午八時三十分大殮，之後於哥連臣角火葬場火化。而香港大學新聞及傳媒研究中心及友人會在一月二十一日下午六時在香港大學本部大樓218室舉行追思會，請發仔各界友好留意。
發仔係趙來發（另名趙啓銘）之暱稱，好多朋友都叫慣發仔，趙來發亦不以為意，事實上，發仔面相甚為年青，似乎青春常駐，左丁山都係最近先至知道佢已經有五十歲。唉，天妒英才，發仔素來心地善良，事事樂觀，實行健康飲食多年（公關大姐大在飯局上，一定為發仔預備齋菜），兼且篤信佛教，無貪無欲，點解會染上癌症㗎，我哋幾年前知道消息，心裏不爽，但又無可奈何，而發仔不失其無欲無求之本色，並不怨天尤人，如今仙遊，希望佢早登西方極樂世界。
留在凡塵的，仍須每日營營役役，為名，為利，為糊口，理由不一而足。此日睇住股市大跌，恒指跌破一萬三千點，幸好下午稍後回升，站穩一萬三千一百點以上，但整體嚟講，已經跌破了五十天平均線，年初之升勢冇晒，早入貨者又試跌入陷阱。我哋活在塵世界，未能看破滾滾紅塵，終日為股市升跌而情緒波動，究竟所為何事，有錢人不妨晚上坐在豪宅客廳，熄晒燈，於黑暗環境下細細思量一番。
記得一九八七大股災之後，左丁山就試過一次，凌晨獨自一人坐在客廳，從玻璃門望出露台外之城門河與沙田馬場，只覺外間萬物無聲，水波盪漾，而自己從無細心欣賞過，要在輸股票輸到喊之後，因為瞓唔着，先至領會到家門之外，景色動人，自己實在係笨蛋。後來睇余光中〈沙田山居〉一文，大詩人寫到：「海天相對，中間是山，即使是秋晴的日子，透明的藍光裏，也還有一層輕輕的海氣，疑幻疑真，像開着一面玄奧的迷鏡，照鏡的不是人，是神。……」我哋要勞煩外來高人指點，先知道沙田美麗一面，豈止是人在山中，而是太過緊張於股市走勢圖之山坡起伏！