煲呔食言，宣佈政改諮詢押後到今年第四季後先做，泛民主議員噓聲四起，並指政制及內地事務局局長林D9就算唔炒魷，都應該放無薪假，事關佢未來大半年無事可做，白支人工不如返屋企休息，為納稅人慳啲錢，先係真正與民共度時艱。
不過政府多冗員，多一個都冇所謂，所以煲呔一口拒絕，更指林D9物有所值，未來仲有大把嘢做，要促進港、台商貿關係，爭取更多就業機會同商機，又要睇實四川災後重建進度，落實在囚人士投票安排等等，都由林D9負責，總之講到香港冇咗佢唔得咁。
實情上述都係實務性工作，點計都唔需要一個政治問責局長去做啦，煲呔咁講已經好牽強，林D9噚日被人問到會否自動自覺停薪留職時，又鸚鵡學舌講多次，不愧為官場至尊人肉錄音機，無負佢自稱人肉MP3之名。
政改方案煲呔拖得就拖，林D9噚日繼續回帶重複播放，指即使押後至年底先開始政改諮詢，社會仍然有足夠時間討論，今年第四季至2010年，有年多時間諮詢公眾，估計2011年中開始立法，隨後會處理2012年兩個選舉安排，佢聲言政府唔會迴避任何爭議性問題。
支持刪減政制局撥款
林D9講來講去三幅被，真係不能任由佢繼續噴口水浪費公帑，民主黨張文光戥納稅人肉赤，每年審議預算案時，都會建議刪除整個政制局開支條數，就算林D9唔辭職，都要佢冇糧出，八方支持佢繼續咁做，同時以納稅人身份，要求財爺制訂預算案時，考慮到政制局工作量減少呢個因素，應該相應刪減政制局撥款，否則對其他政策局都唔公平。
審計署都應該幫林D9做份衡工量值報告，計吓佢年薪千萬有否做好佢份工，擺明少咗嘢做，又唔使減人工，咪即係奉旨蛇王？既然林D9自稱係人肉MP3，不如將翻來覆去幾句言論，用部MP3錄底，日後立法會開會，放低部機自動發言就得。買部MP3幾百蚊有交易，何解納稅人仲要每月畀廿幾萬人工佢呢？副局長譚志源主要負責政改諮詢，大半年時間無事可幹，如何打發時間，相信佢都好苦惱。
mailto:[email protected]