農曆大年初二，《通勝》話宜祭祀、祈福、理髮、開市，忌開渠放水、安床，不過示威抗議唔使擇日，自由黨送鼠迎牛脫胎換骨，有兩項破天荒、創歷史行動。
第一項係大年初二，由黨主席劉健儀率領黨眾殺上禮賓府同煲呔開年。八方聽聞自由黨打算送盤「十全盆菜」畀煲呔，餡料少不了發財好市、唔好炒魷魚等等，飲食界張宇人話志在參與，由佢張羅盆菜亦唔會托手踭。
今年高層多留港
另一史無前例行動，係會上門去中聯辦拜年，唔止去西環，黨領導層、議員會逐一到中聯辦港島、九龍同新界三個工作部拜年，黨內人士指以往只會喺團拜場合同中聯辦官員拜年，今次咁隆重，可見自由黨重視同中聯辦關係。八方認為名為拜年，實為拜票，事關去年選舉自由黨不獲中聯辦配票而慘敗。
自由黨高層新年慣例外遊，今年為咗同煲呔開年、去中聯辦拜年而留港，張宇人則話佢多數留港消費，因為年初三有賀歲馬，而另一位副主席方剛年初二要留喺屋企開年，未必去禮賓府，佢話農曆年後會催谷煲呔發力幫助零售界度過淡季難關。