昨日跟黃麗梅May與袁彌明Erica，見識過萬二蚊一斤的鮑魚，真係未必個個買得起，今日一於回歸基本，再跟佢哋掃些其他平價年貨，蠔豉、冬菇、元貝、髮菜當然不能少，還有罐頭鮑、急凍螺頭及大網鮑，全部幾百蚊有交易。吃不起日本亁鮑，吃罐頭鮑也不失禮呢！
記者：黃潔蓮、趙佩倩
攝影：周旭文、梁細權
示範：海景嘉福酒店海景軒總廚梁輝雄（27312883）
袁彌明髮型：Nelson@Hair
行情篇
金牌安記菇皇
雖是國產花菇，但有衞生檢定合格證書，且肉厚有香味，一般差不多質素的日本花菇，閒閒哋要幾百蚊斤，呢隻價錢夠平，真係食得過！
原價$150/斤
特價$88（b）
日本大蠔豉
蠔豉意頭好，香味亦比鮮蠔濃很多。揀靚蠔豉，以蠔身飽滿、顏色鮮明、亁爽為佳，儲存在冰箱最好。
原價$200/斤
特價$180（b）
特級安記鮑魚菇
吃不起鮑魚，食這種質感極似鮑魚的鮑魚菇，絕對上得大枱。
原價$35/罐
特價$15（b）
鯨鯊皮充花膠
成吋厚的鯨鯊皮，浸發方法同花膠一樣，發完後亦厚如花膠公，質感極黏滑，會漿住嘴唇。店主棠哥話對皮膚亁燥痕癢極有幫助。$680/斤（c）
高寶牌清湯鮑魚
每罐有兩隻鮑魚，清湯煮製，原罐烚一小時即可食用。
原價$250
特價$200（a）
澳洲急凍大網鮑
大大隻的網鮑最啱用來煲湯，切件用來炒餸亦可。
原價$420/磅
特價$300（a）
澳洲海上鮮鮑魚
用鹽水浸泡的鮑魚仔，每杯有6隻，即開即食好鮮味。
原價$220/杯
特價$150（a）
美國響螺頭
美國響螺頭肉味鮮甜，用來煲湯最好味。
原價$380/盒
特價$300（a）
北海道宗谷元貝
有人認為如非做瑤柱釀節瓜脯，否則也不用買大粒的元貝，但元貝始終越大粒，香味越濃的。
S貝（約100粒）
原價$380/斤
特價$330（b）
M貝（約80粒）
原價$480/斤
特價$380（b）
寧夏髮菜
現在好多假貨充斥，揀時要留意，摸上手唔拮手、冇雜質為之靚貨。$30/両（b）
發浸篇
元貝
剪去硬枕，然後加入凍水浸過面，浸2小時至腍，加薑片及少許油，隔水蒸2小時即可。
髮菜
浸凍水約30分鐘至腍。因髮菜易藏頭髮，所以清洗時要不時用手撕碎，確保髮菜亁淨。
冬菇
用凍水浸泡2至3小時，浸的時候最好用碟壓着，否則冬菇會浮面，難以浸透，然後剪走菇椗便可。
蠔豉
將蠔豉浸凍水1晚，清洗亁淨蠔身上的殼碎便可。
烹調篇
梁輝雄師傅
入廚超過30年，擅於炮製時令小菜及廣東美饌。最近獲得由世界中國烹飪聯合會主辦的第六屆中國烹飪世界大賽之個人賽「熱菜項目銀獎」及「國際大餐大師獎」。
金鳳元貝
2hr15min
製作難度：★★★★☆
將瑤柱兩煮，有脆有軟，加上素雞和熟雞絲配搭出色，咬落口感極佳。
材料
瑤柱6粒（已浸軟）、素雞1件（切絲）、熟雞絲6両、菜心8條、甘笋絲1両
蟹黃芡料：蟹膏11/2両、雞湯125毫升、鹽1/3茶匙、糖/胡椒粉/麻油各少許、生粉水適量
做法
1.將2粒瑤柱搓成絲，放滾油炸至金黃撈起；其餘4粒瑤柱原隻隔水蒸2小時。
2.將蒸好的瑤柱放大碗中間，鋪上熟雞絲、素雞絲及甘笋絲壓實，倒轉上碟後攞起大碗吸成半圓形。
3.將蟹膏壓爛。燒熱鑊下雞湯、鹽、糖、胡椒粉及麻油，再下生粉水埋薄芡後熄火，加蟹膏兜勻至稠身後淋上碟，面撒炸過的瑤柱絲。
4.菜心炒熟伴碟即可。
貼士
埋蟹黃芡時一定要熄火後才下蟹膏，否則芡汁好易會炒到起粒，食落嚡口。
發財如意卷
0hr20min
製作難度：★★★☆☆
師傅用髮菜襯上白色的墨魚膠來捲成如意卷，一黑一白，十分搶眼！記得打墨魚膠時加少許日本芥辣，更可帶出墨魚鮮味。
材料
髮菜2両（浸濕）、蛋2隻、墨魚肉6両、甘笋條1條、雞粉1/2茶匙、麻油/日本芥辣各少許、鹽2/3茶匙
做法
1.髮菜浸發後略瀝亁水，加1/3茶匙鹽及麻油拌勻醃5分鐘。
2.墨魚肉加入1/3茶匙鹽、雞粉及日本芥辣攪勻，打至起膠。
3.蛋拂勻，倒入熱鑊煎成蛋皮，抹上墨魚膠掃平，一邊放甘笋條、一邊鋪上髮菜，分別於兩邊向中間捲起成如意形。
4.燒滾水，將如意卷隔水蒸5分鐘，切片排上碟。
貼士
髮菜浸發後瀝亁，加入少許麻油可去除異味。
琵琶金蠔
0hr45min
製作難度：★★★☆☆
蠔豉要煮得好，之前要浸透身，然後再用薑葱及調味料燜腍。
材料
豬肉茸6両、冬菇1隻（切粒）、蠔豉12隻（已浸）、甘笋薄片12片、薑1片、葱1棵（切段）、紹興酒1湯匙、蠔油1/2湯匙、糖少許
豬肉茸調味：鹽/糖各1/2茶匙、生粉1茶匙、麻油/胡椒粉各少許
芡料：雞湯125毫升、糖少許、生抽1茶匙、生粉水適量
做法
1.蠔豉洗淨瀝亁。
2.起鑊爆香薑葱，灒酒後下蠔油、糖及蠔豉，注入少許水，開慢火燜30分鐘，取出攤凉。
3.豬肉茸加入調味料及冬菇粒拌勻，將適量的豬肉茸黏上蠔豉，以甘笋片捲好，隔水蒸8分鐘上碟。
4.燒熱鑊下芡料煮勻，埋生粉水芡，淋上蠔豉面即成。
貼士
亦可將蠔豉加薑及葱隔水蒸腍20分鐘代替做法2。
查詢：
（a）高寶食品公司（25467199）
地址：西營盤崇慶里4號C地下
（特價優惠至1月24日止）
（b）安記海味（25446336）
地址：上環急庇利街8號金豐大廈地下F至G舖
（特價優惠至1月25日止）
（c）德祥號魚翅（25477009）
地址：西營盤崇慶里5至7號地下
（特價優惠至1月24日止）