左丁山此日路經彌敦道黃金一里，午飯時候已過，又口渴，於是不假思索，走入酒店商場內一間專賣德國腸、奧地利腸之餐廳，以為食個快餐，可以立即鬆人，點知叫咗一個洋葱湯，十幾分鐘未到，於是向經理追問，經理唔使一分鐘就送來洋葱湯，快得驚人，但點解未搵經理之前，要癡癡地等？一飲，弊咯，湯唔夠熱，洋葱冇味，三流水準也；食麵包啦，麵包凍夾硬，主菜係維也納腸，叫做不過不失，埋單計數，連一杯紅茶，加一之後共二百二十八元，不禁肉赤。如此食物，如此服務質素，認真唔抵，唔通就因為餐廳位於彌敦道黃金一里，價錢就咁貴？
跟住仲激氣，因為公關大姐大來電，猛話吃咗一餐幾好嘅，享受埋冬日陽光與殷勤侍應服務㖭，埋單係二百八十元有找，冇法子唔讚一番。公關大姐大食得好何須向左丁山匯報呀？大姐大話：「我睇完你寫，先至知道金鐘有一間新餐廳叫做Domani㗎咋，咪去試吓囉！」原來如此，即係話如果食過唔好，佢就立即會打電話嚟鬧左丁山亂咁寫嘅啫！唉吔，公關大姐大去太古廣場吃setlunch，非常滿意，付出不需$288，而左丁山食到一肚氣，吃完仲肚餓，就支出$228，愈諗愈覺得自己笨！在Domani，麵包好食，食完又有，淨係食麵包都可以食到飽。
講起西餐廳麵包，中環「占美廚房」甚有特色，夠軟熟，特別係派麵包嗰位阿姐，可稱為麵包皇后，行埋客人旁邊，逐款介紹，款款話好食，有時畀佢講到心郁郁，食多幾塊，吃到半飽，主菜竟然食唔得晒。在西餐廳內派麵包只係一件好普通嘅工作，五星級酒店餐廳嘅侍應都只係行埋嚟，問一聲：「請問要邊件？」客人要咗兩塊之後，侍應就行人。只有「占美廚房」嗰位阿姐會逐件麵包介紹其好食之處，游說食客要多一件又一件又一件，如此敬業樂業，當今少見也。
返到中環，本想再到翠華食碗魚蛋粉，但回心一諗，是晚賓架W會在沙田馬會請新亞學生吃自助餐，搵埋左丁山去做陪客，不如留番個肚啦，於是作罷。賓架W年年捐錢搞「英語演述工作坊」，培訓學生兼請埋受訓學生食一餐，可敬也！