早排搵過EO2試農夫車，光頭成員Eddie揸咗架HondaSpike出場，搞嘢搶眼程度比架Pick-up仲要勁，四條軨上加咗迎風而轉嘅風車狀物體，全電鍍Bling到爆，一路行一路轉，睇埋Eddie個Look，幾乎肯定係車公或哪吒托世，新年流流許番個願都好吖。
記者：徐影龍
攝影：陳盛臣
喪轉，向風車許願
11年車齡，Eddie由入門級飛仔Civic，過渡到成熟住家男Echo，家陣轉揸盒仔車HondaSpike，漸漸擺脫飛仔味，「其實做Artist最緊要架車，唔係代步而係要嚟Hea，少少等埋位時間，舒舒服服攤喺架車度瞌番陣，真係好緊要。所以我改裝架Spike，都集中晒Outlook同內櫳度，最滿意係跟Spike車會啲高手裝嘅電鍍軨，四條黑軨上加個風火輪，行車、停車時都會不停轉，好意頭亦搶眼，經常停燈位時，隔籬司機掛住望，搞到綠燈都唔識開車，亦試過一班小朋友踎喺馬路邊圍住睇，估佢會唔會飛出嚟變武器，勁有想像力。」
筆者忍唔住伸手搞吓個風火輪，好似年初三入車公廟咁，順便許番個發達願望。發覺風火輪幾厚幾重，仲要全金屬加電鍍，應該唔平，「其實唔貴，每條千零蚊，不過俾人抄過類似輪胎有不當裝飾嘅牌，連阿Sir都話第一次引用呢條例，唔通驚好似血滴子咁飛出嚟？」
寸樣，被寃揸大膽車
Eddie天生寸樣，記得喺《三岔口》度扮大佬，落Club同人嘈，嗰份殺氣、囂張，夠晒資格接小春棒做山雞。呢份天生「麗質」，喺Eddie真實人生一樣影響至大，考牌5次先成功，全部肥喺鋒芒畢露度，「我5次都係考棍波貨Van，考牌官見我轉波吊極力子純熟，斷定我揸大膽車，借啲意叮我走，其實我親戚係教車師傅，經常講啲揸車訣竅畀我聽先咁易上手。」無計，香港地以貌取人，我之前都以為EO2入面最難相處係Eddie，不過訪問過兩次，真人好Nice兼講嘢唔避忌，讚EO2喺頒獎禮表現有台型，「有咩用吖！都無獎嘅。」咁William喊苦喊忽擔心跳舞無市場，又點睇？「點會！你諗吓，企喺度唱歌，同跳住舞唱歌，邊樣娛樂性大啲？正如車壇一樣，遇着金融海嘯即時靜晒，其實需求一樣有，睇你有無本事彈到出嚟啫。」