賭王何鴻燊有四房妻妾，早幾年互相鬥法，二姨太藍瓊纓嘅「如來佛對通臂猿猴」論，令人印象深刻。不過，隨住元配黎婉華過咗身，二姨太藍瓊纓又深居簡出，近年只有三姨太陳婉珍以及四姨太梁安琪，喺賭王身邊車輪轉。
何超瓊噚日做召集人，喺中環舉行「祖國新貌面面觀」展覽開幕禮，佢媽咪藍瓊纓罕有咁出山撐場，同場仲有何超鳳、何超蕸以及賭王何鴻燊等。問二姨太𠵱家係咪住喺香港？佢話：「未必，四海為家。」身旁嘅何超鳳即時話：「唔好咁講啦，好似流亡咁！」二姨太懶理咁多，繼續講：「總之鍾意去邊就去邊啦。」不過佢話都鍾意香港。
超瓊新年歐遊
記者問二姨太點解好少見佢去ball？佢就好玄咁話：「我鍾意靜，隨心所安，隨遇所安啦。」超瓊就透露新年會同幾個妹妹同家人歐遊10日，但細佬何猷龍會返加拿大，佢話：「希望新一年社會穩定發展，過去一年真係比較刺激。」