藍鑽石係「小飛俠」「粉絲」，長期追睇小妮子做嘅財經節目，該節目某日提到滙控可能跌到30蚊嘅傳聞。就咁聽，我唔會信，你唔會信，但呢個時勢大行好似前世有仇咁起勢唱啖，有咩唔可以發生？如果係嘅話恆指起碼跌到七、八千，死得人多。球壇都有「大藍籌」靠唔住，今次睇死賓菲加失威，扒冷！
最近寫唔少葡超波，如果係葡超，我唔敢追賓菲加對家，但今晚主場對比蘭倫斯係葡聯盃C組賽事，情況唔同。兩隊分別喺分組得6分同4分，賓菲加唔輸嘅話出線形勢都唔差，隨時留力聯賽同波圖死過。再講，賓菲加近仗後防錯漏唔少，打真軍都未必贏硬，今仗可冷吼和、博「大」膽。
買定花生睇曼城鬥韋根
更「大」膽應該係曼城對韋根。曼城斟我愛隊大將卡卡係後話，就算冇卡卡主場攻力都唔錯，但後防不濟又係人所共知。韋根勢頭唔錯，今勢與主隊鬥攻，可買定花生等睇入球騷。米禾爾剛引入查爾頓前鋒麥里奧特，以為執到寶，其實查爾頓處於劣勢，剩餘物質好極有限；燦美爾近況勇，客W唔出奇。
最後冷選AC米蘭派路入「首球」，呢個派牌王上場唔多願畀波碧咸，可能係對班主嘅無聲抗議。有火球員我鍾意，博佢遠射開弓先入波。
文：藍鑽石