煲呔今日的我打倒昨日的我，押後諮詢政改方案，民主黨噚日操上政府總部抗議，主席何俊仁即席寫咗可恥兩個大字畀煲呔，批評佢言而無信，仁哥本來想寫埋民主黨上去，遭張文光喝止，因為咁寫即係指民主黨可恥，萬萬不能！
淫審條例慢慢拖
張文光人急智生，話一於寫「民主拖」啦，用嚟做大毛筆個地拖，就賜名民主拖，最好送埋畀特首辦，諷刺煲呔政改諮詢拖得就拖。煲呔使出拖字訣，落柯打指有爭議性政策，出台前都要反覆、正反辯證得透透徹徹，有官場中人笑言，此令一出，相信有唔少同事頓時清閒，反正呢啲辯證工作正一長命工夫長命做，今次真係奉旨嘆慢板。
八方聽聞其中一個可能遭「急凍」嘅，係商務局檢討《淫褻及不雅物品管制條例》計劃，據講由於有關方面認為家長、學校方面嘅意見聽得唔夠多，加上家校組織又以月前係考試季節為由，唔得閒發表意見，想當局畀多啲機會佢哋講嘢，因此原定於本月底屆滿嘅諮詢期，可能考慮延長，既然煲呔話要反覆辯證，淫審條例咁敏感而且爭議性大，最好慢慢做嘞。