女男爵鄧蓮如退出香港政治舞台多年，但仍頻頻喺社交圈子蒲，前晚着咗素淨黑裙配三行粉紅色珠鏈，非常英式lady優雅格調，現身上環一間畫廊，原來係去捧多年髮型師KimRobinson場。Kim同八方講，同鄧蓮如認識近30年，由髮型師變成朋友，因此今次Kim舉行處男畫展「WishfulThinking」，鄧蓮如都特登返港捧場，可見兩人交情深厚。
據Kim透露，佢大約30年前認識鄧蓮如，當年鄧蓮如去髮廊剪頭髮，自此結下剪不斷嘅緣份，鄧蓮如每次返香港，都會搵佢剪髮。鄧蓮如係商界女強人，港英年代政壇一姐，港督都忌佢幾分，幫位高權重女男爵剪髮，有冇手震？
「佢好隨和，來到髮廊便由髮型師決定，好信任髮型師，冇特別要求。」Kim話，由於鄧蓮如係政界要人，經常出席隆重場合，所以髮型不能太花巧，「其實佢同一般女士冇分別，都想每季換新髮型，但係要配合身份，所以髮型要比較典雅同女性化。」
對髮型越來越open
陳太遊行完都要恤髮，葉劉視「掃把頭」如命，可見頭髮對一個女人有幾重要，八方睇鄧蓮如歷年打扮造型，發現變化好似不大，一律短曲髮，一絲不苟，睇得多唔悶咩？Kim則話短髮易打理，所以鄧蓮如幾十年如一日唔留長頭髮，至於髮型好似冇乜變化，佢反應幾大，「其實長度有唔同，而且電髮造型都有唔同，絕對唔係一樣。」
前晚鄧蓮如出席Kim畫展開幕禮，個新髮型都係出自Kim之手，佢話每次剪髮前，雙方會傾吓想轉換邊款新髮型，鄧蓮如退出政界，對髮型越來越open，樂於嘗試新造型，最新一頭清爽短髮，就令佢睇落神采飛揚，「佢𠵱家享受生活，呢個新髮型比較摩登、運動化，看來更亁淨利落。」Kim話唔同場合、身份應該有不同造型，𠵱個新髮型，襯晒鄧蓮如自由自在嘅生活。八方聽聞搵Kim動剪最低消費6,000蚊，要享受貴族式剪髮服務，當然要畀貴價。
mailto:[email protected]
