選美出身、有「翻版常盤貴子」之稱的徐自賢，現已投身亞視，由最初來港時對廣東話一竅不通，經過幾年苦練後判若兩人，令她進步神速的竟然是劇集拍檔陳啓泰，因她拍劇時被陳啓泰公開嚴厲執字，壓力很大。
徐自賢04年代表洛杉磯參選華裔小姐時被稱為「翻版常盤貴子」，其後輾轉在娛樂圈發展，現時學得一口流利廣東話，早前參與拍攝亞視重頭劇《法網群英》演出，適逢亞視高層變動大鬧風波，令公司上下人心惶惶。
逐個字糾正
徐自賢盼望劇集可以推出，她說：「我對套劇有期望，希望公司唔好嘥咗大家心血。」她形容在亞視初期參與演出時廣東話語無倫次，後來夥拍陳啓泰拍劇，得對方嚴厲教導，她說：「我拍咗劇之後，廣東話比半年前好好多，因為有陳啓泰教我。佢好執着㗎，會逐個字執我，執完之後語氣會加重啲，可能會影響演技，但都好多謝佢嚴厲教我，先可以講得咁流利，有時又會NG怕連累大家，所以有啲壓力。」
盼30歲結婚
徐自賢甚少與緋聞扯上，她也渴望可以覓得理想對象，但慨嘆說：「自己少出去玩，接觸唔到異性，但我相信緣份，女仔被動啲會吃香啲。」至於會否恨嫁入豪門，她說：「呢啲係命嚟，有嫁入豪門命就會有，冇就始終會離婚，我都希望30歲前可以結婚生仔，𠵱家25歲，仲有時間。」
採訪：卓寶花 攝影：陳俊強
服裝提供：極品特區
髮型：ZellofHHHairSalon