大摩經濟師羅奇來港做大摩亞洲區主席，唔覺眼已年半，噚日佢做亞洲協會午宴演講嘉賓，講咗個笑話，解釋點解會嚟亞洲工作。
羅奇話自己一早唔睇好美國前景，不斷發表唱淡美國經濟嘅言論，搞到唔少美國人對佢生厭，同事都話公司喺美國有大生意，既然羅奇咁睇好亞洲，不如調去啦！好可惜，佢嚟亞洲冇幾耐，𠵱家又開始睇淡亞洲嘅前景。
會上主人家亞洲協會主席陳啓宗，大讚羅奇對經濟前景預測準確。陳啓宗想當年，話朱鎔基仲係國務院總理時，羅奇同另一位知名經濟學家曾一齊北上見朱總，向佢分析當時國際形勢，會後朱總對羅奇話，好希望佢講嘅嘢係錯，但仍會因此做好應對準備。結果，翌年羅奇繼續有機會面見朱總，同行嗰位經濟學家就消失咗，因為佢嘅預測冇應驗！