容祖兒噚日着住一身瑜伽服，喺跑馬地出席「香港瑜伽馬拉松2009」記者會，最近有報道話祖兒會喺港台《十大中文金曲頒獎禮》掃走五個大獎咁多，佢話未收到通知，到時先算喎，有咪當拆禮物囉！
揀禮物賀阿嬌
之前鍾欣桐（阿嬌）提早開咗個生日派對，祖兒都有去，問佢送乜畀阿嬌，阿嬌心情點？祖兒話：「我未送呀，嗰日都唔係正日，仲揀緊，佢心情唔錯，大家都玩得好開心。」問到阿嬌有冇提起今年復出嘅事？祖兒話：「冇講呀，我都唔係好清楚。」
祖兒話平時都有同媽咪去上瑜伽堂，問佢會唔會喺沙灘做瑜伽？佢好大反應咁話：「梗係唔會啦！」佢做瑜伽都係想陪吓媽咪，好多時因為氣氛太過relax，做做吓佢都會瞓着，仲試過要人拍醒佢先識落堂㖭！
講起瞓覺，祖兒表現得好雀躍，佢由細到大因為瞓覺而搞出唔少笑話，佢話：「細個一上中史同西史堂就會瞓覺，試過瞓瞓吓，覺得好多人圍住我講嘢，原來我成枱都係口水，又試過搭地鐵企喺度都瞓得着，差啲仆親。」