連串負面消息湧入股海，大市沽壓果然加大，恒指昨日一度急插逾800點，其後跌幅才逐步收窄。導致今波大跌的股份主角之一，當然係滙控（005）。滙控收報66元，若以除息調整之前價格計算，股價已重返10年前低位，滙控過往多年以來予散戶的印象係「有買貴、冇買錯」，但現價根本唔吸引，所以唔考慮。
值博率勝滙控
金融海嘯令銀行股受到極大考驗，銀行面對客戶貸款風險上升，須增加資本金額，較早前進行過集資的銀行股，值博率理應較高。去年11月宣佈供股集資的渣打集團（2888），本月初股價曾炒上120元，但以尖頂形態回落，短線走勢應見頂，想趁淡市買入，應未係最理想時候。
渣打剛有要員辭職，有外資行認為有關人事變動對渣打構成短期沽壓，講到尾都係藉口而已！銀行股全線向淡，料渣打或下試1年低位75.30元，一於守株待兔。
方星俠