周秀娜箍靚牙<br>願為金城武剝衫

周秀娜箍靚牙
願為金城武剝衫

有「翻版樂基兒」之稱的𡃁界名模周秀娜(Chrissie)近日有幸與陳寶珠在舞台劇《我愛萬人迷》上合作,她自爆在台上時烏龍百出,更險些當場仆倒,搞到全場觀眾立即爆笑。最近箍牙的Chrissie就強調不怕之後會被指整容,她坦言如劇情需要,她不會為性感定底線,如果能和型男金城武合作就必能打動她。

𡃁界名模周秀娜一出道就被指貌似樂基兒,亦因為挾住「翻版樂基兒」之名而廣為人認識,近日她更有機會參與由陳寶珠領銜主演的舞台劇《我愛萬人迷》,雖然在舞台劇中她只演兩場戲,但今次卻令她有一個好好的學習經驗,特別是有機會同寶珠姐合作,她更大讚寶珠姐沒有架子,她說:「寶珠姐勁好人,同我哋冇隔膜,佢有好多fans請食嘢,佢都會請埋我哋食,佢又好識關心人,見我手凍就叫我着多件衫。」

樣靚身材好的周秀娜,挾「翻版樂基兒」之名獲得不少工作。

近日箍牙的周秀娜不擔心事後會被人暗寸整容。

台上跣腳觀眾爆笑

由於Chrissie知道舞台劇是沒有NG,所以起初她十分擔心,更自爆在舞台上烏龍百出,她笑說:「有場戲講我做按摩技師同寶珠姐按手按腳,但踎低時我差啲成個人向後跌,好彩寶珠姐即時扶實我咋,但係全場觀眾都睇得一清二楚,搞到全場爆笑,真係又𤓓又瘀呢!」
Chrissie因為有感牙齒生得不整齊,所以最近就花費了35,000元箍牙,她坦言十分肉痛,但為有美麗的笑容亦甘願付出昂貴的價錢,不過對於有不少女藝人箍牙後都會被指整容,Chrissie就對自己相當具信心,並說:「唔怕,因為我一路都會出嚟見人,個樣唔會特別變,除非係突然唔同樣啫。」

周秀娜在陳寶珠(中)主演的舞台劇《我愛萬人迷》中扮演按摩女郎,並大讚寶珠姐沒架子。

一見偶像隨時口啞

忙完舞台劇後,Chrissie正接洽拍攝一部新戲,她坦言對拍戲和模特兒工作都十分感興趣,至於是否接受性感演出時,她就表示如果劇情需要亦不會介意,不過當問到有否定下性感底線時,她就說:「冇set底線,最主要睇劇本,不過𠵱家都未有心理準備拍好裸露嘅戲,但係我就最想同金城武合作,佢太有魅力,可能我一見到佢就乜嘢都講唔出口。」
採訪:駱華齡、藍文浩 攝影:陳俊強
化妝:MEGGEN 髮型:Zap@Chin.G
服裝提供:2% 場地提供:Eutops

周秀娜不介意在電影中作性感演出,如果拍檔是型男金城武(小圖)的話更二話不說答允。