成功冇捷徑，德甲升班馬賀芬咸今季騎住拜仁慕尼黑，做埋冬季冠軍，絕對唔係靠運氣咁簡單。原來佢哋養咗班「瞥伯」，用攝錄機拍低對手操練情況，然後用電腦分析，從而一躍成為德甲「1哥」！
賀芬咸招募「瞥伯」
賀芬咸高層承認，從海德堡大學招募咗14名大學生，攞住攝錄機去拍對手操練，然後送到分析部門，再綜合傳媒報道、比賽數據等進行分析；每支球隊都會建立一個檔案，畀教練構思戰術安排時作參考，難怪佢哋上半季成績咁好啦！
目前聯賽與賀芬咸同得35分，以得失球差屈居次席嘅拜仁，自然成為賀芬咸「瞥伯」嘅偷拍對象。該隊教練奇連士文接受德國《體育圖片報》訪問時話：「我早就聽過（偷拍行為）啦！啲人覺得冇問題咪做囉，反正我哋唔會好似人哋咁癲。」
記者問奇連士文會唔會閉門操練，以避「瞥伯」，佢咁話：「當然咁樣可以防止偷拍，但如果有人千方百計要昅嘢，基本上防不勝防。」其實拜仁咁有本錢，使怕對手偷拍咩？
無論偷拍應唔應該，我求大俠都好佩服賀芬咸嘅專業態度，究竟背後最大功臣係邊個呢？就係球會背後財主、德國軟件界巨頭賀普（DietmarHopp）啦！呢位68歲老先生揼水之餘，將科技結合埋足球，今季一升班就成為德甲榜首，震驚歐洲球壇。
歇冬期間，賀芬咸去咗西班牙集訓，周三同漢堡進行熱身賽輸0:2，班「瞥伯」都有跟埋去。
伊比斯域傷韌帶大鑊
可惜球員幾時受傷冇得分析，暫以18球成為德甲頭號射手嘅伊比斯域，臨完場拉傷右膝韌帶，已經返咗德國檢查。睇嚟佢有排先可以落場，不妨客串做球隊「瞥伯」啦！
不過，科技始終唔係100%準確，好似球員情緒就分析唔到。同樣係對漢堡場波，巴西中場卡路士伊度亞度從後攔截對手奧歷，雙方不滿大打出手，好彩球證拿拿臨吹雞完場。奧歷事後批評對方：「友誼賽使唔使咁狼呀？」唔通賀芬咸偷窺成狂，搞到班球員零舍唔冷靜？
