青樓名妓何堪寂寞？亞視執行主席張永霖噚日出席港大專業進修學院講座，大講投資心得，佢認為待恒指跌多兩至三成先好入市，最好買公用股，千祈、絕對、死都唔好「掂」8號仔。
張永霖炒股40年，自言屙夜尿時都會昅昅美市，97年時預測金融風暴後衰7年，今次金融海嘯最少8至10年先復元。佢透露去年股市高峯時套現，將八成資金收落床下底，所以大跌市都冇輸錢。張永霖奉勸年輕人唔好怕蝕底，有份工就做住先，最好有個專業資格或識多種外語；一把年紀嘅要持盈保泰，萬一被裁員都頂得吓。
有人問到佢點處理裁員，佢話問啱人嘞，因為佢係減薪專家，試過減16,000個員工人工、花紅。至於亞視去向，佢話2月中有公佈，亞姐重選會請小霍等五位有公信力人做評判。