每次去日本旅行，都會到中野附近的買取店或新宿、澀谷的跳蚤市場走一轉，總覺得拾到別人的滄海遺珠才算得上是沒有白行一趟的旅程。香港要買新貨的地點有大把，想搵中古潮物難過登天，難得有他做先鋒，為興趣開了本港少見的日式買取店DAY，拍住美華士一東一西咁造福潮人，沒有龐大的收買團隊，由早到晚只見他一人坐鎮。呢排市道唔好，咁啱手頭上想放貨希望幫補一下緊絀的荷包亦不用怕找不着門路，容許在下借這個小小的空間讚一句：Cody先生，你真偉大！
記者：葉雪芯
攝影：楊錦文
買取店的日式電車男
中間分界、黑框眼鏡、棒球褸、藍白直間COMMEShirt、吊腳卡其色斜布褲加一對JunyaWatanabe行山鞋，老遠見到一身日本電車男打扮的Cody行過來，還未開始傾偈，心中不禁暗忖：「又來一件崇日潮童？」阿媽教落不要以貌取人，Cody一開口說話竟然估你唔到咁Nice，當打開店門入內做訪問時他客客氣氣地說：「有點亂，地方淺窄」，也把我弄得有點不好意思。
甫進店內，第一感覺便是很「古董」，隱約Feel到一陣Vintage風飄埋身。雖說是的確有點亂，但在凌亂之中，霎眼已經可以從眼尾餘光之中見到不少COMMEShirt、Burton風褸、Visvim流蘇鞋等正嘢。DAY是尋寶勝地不用多說，潮事或者可以容後再提，恕我公器私用率先好奇一問：香港開買取店，有錢賺咩？他一於淡定有錢剩地說：「比兩年前在總統商場開日本潮物水貨店好啲啦，以前唔係賣舊嘢，專賣新貨，不過呢行競爭好大，越來越難做，索性結業。」
賣舊嘢識朋友
「我都幾受日本文化荼毒，其實一直都好想開一間類似原宿、上野的二手寄賣店，始終睇準香港少有這類店舖，於是開始籌備，一年之後，就開咗呢間DAY。𠵱家一腳踢，開舖、睇舖、驗收、執貨、拍照放上拍賣網等等，乜都自己搞掂，客人拎貨過嚟，寄賣為期半年，定價由佢哋自己話事，賣得出我就收番15%佣金，我的成本就係舖租，負責提供一個地方畀大家放貨。事實上街外新貨Mark價實在太貴，很多鍾意買日本嘢的人都會退而求其次買二手。」開買取店，除了搵錢Cody亦賺得滿足感：「以前賣新貨，客人走入來搞搞震一輪就唔買，但𠵱家入來的客人好多都係有心買嘢，真係一心打算來尋寶，好有心機慢慢揀，有時仲會大家交流一下潮流大小事，開心好多。」
中古時裝有價有市
買取店在香港少見，而且舖頭選址正正黐住另一二手店龍頭美華氏，一山藏二虎喎！不過Cody就不太擔心：「美華氏是我偶像，我都很鍾意去買嘢，一年到晚都有人去尋寶，成間舖頭就是代表一個文化。未開舖做老闆之前長時間幫日牌水貨店做買手，發現𠵱家嘅後生仔對於中古時裝一早已經接受咗。香港的潮流文化好跟日本，之前本地一些潮誌搞中古拍賣場又幾受歡迎，問過身邊的朋友，去日本的景點之一肯定有買取店份，再眼見RAGTAG做得咁成功仲有炒價就知二手市場有得做。不過RAGTAG似米蘭站，店主買斷咗件貨，放唔放得番出去都要負擔個Cost，若然要我咁做，我就的確唔敢喇，風險太高。」
二手家品的故事
早前在《Milk》睇過Cody的專欄，令人出奇的是內容不是古着而是傢俬家品，原來這是他的第二最愛。Cody說最近考慮DAY的大搞計劃中亦包含二手傢俬家品：「我很鍾意古董舊嘢，舖頭裏大部份的傢俬家品裝置都係我搵番來，有啲甚至是親手製造。每件都很有懷舊味道，好似每一件家品都有佢哋嘅故事，而我就幫佢哋延續落去。可惜要香港人買舊傢俬家品暫時未太接受，而且搵舖難，未必有一個咁大面積嘅地方去寄賣兩類不同貨種。」
潮童Bape嚴重滯銷
每日貨來貨去，邊種貨賣得邊款滯銷應該不難發現，循例一問往後的日潮Trend，就連咁貼近潮流的Cody都說越來越難捉：「𠵱家好難估，有啲我自己都唔覺有特別嘅貨，又會有人問、賣得出，反而一些以為好搶手嘅擺低兩個幾月掂都未掂過。坦白說，近年的日本牌子都唔靚，講款式，以前日牌的設計真係好靚，每個Brand都有自己特色：簡單的有CdG、前衞又有Undercover，呢啲真係長青，不少人着完第一轉新款再返來放貨，依然賣得出；再舉例好似Visvim鞋，其實款式來來去去幾款，但長年都襟；歐洲貨都係最易放，罵治（MaisonMartinMargiela）亦是其中一個長年企得住腳的牌子。若果籠統咁講，Classic和Vintage始終當道，而且短期內會比較LongLasting，COMMEShirt、NEIGHBORHOOD牛仔褲呢類貨無論入手還是放貨都最穩陣。潮童Bape？𠵱家真係無人着喇，盡量都不會收太多，費事賣唔出。」
近期熱賣之中古潮物：
DAY（28872891）
天后屈臣道15號維多利中心地下53舖