黎姿傳下月結婚，前晚她曾代言的時裝品牌開騷，鍾嘉欣獻出首個天橋騷，更大送秋波，硬銷玉女形象自薦任代言人。同場，移居內地在即的羅霖，獲兒子、家人及好友打氣其lastshow，難怪她頻呼不捨。
黎姿、蔡少芬曾擔任代言人的時裝品牌Moiselle，前晚在灣仔會展舉行2009春夏時裝騷InFullBloom。新裝以法國凡爾賽花園作靈感，一片春日浪漫情懷，周汶錡（Kathy）、小小超前緋聞女友陳碧舸（Bonnie）和AnaR.等行騷，羅霖（Candy）及鍾嘉欣示範三套新裝，鍾嘉欣更壓軸出場，無綫高層樂易玲也現身撐愛將。
樂易玲撐場減壓
鍾嘉欣完騷後仍然甚high，她說：「係我第一次天橋行catwalk，好緊張，換衫好趕，我同幾個藝人都有獨立更衣室換衫，Kathy幫我整好啲頭髮，Candy又教我有寒背，可以傾斜啲個身就番。我今日午餐已經係最後一餐，想以最佳狀態行。」對於樂易玲撐場，她說：「係呀，好開心見到佢嚟支持，我喺台上有同佢眼神接觸，冇咁緊張。」
Moiselle多年代言人黎姿傳下月出嫁，大好機會頂替接棒，鍾嘉欣初時說：「唔好咁講，要經理人去傾，睇將來啦。」不過，鍾嘉欣也不忘大送秋波sell自己說：「不過啲衫真係好靚，做代言可以學着靚衫，我都覺得自己適合，因為啲衫好女性化，好啱自己image，我都係走玉女同乖女路線。」Moiselle老闆陳欽杰則指黎姿合約已滿，也會考慮鍾嘉欣任代言人。
羅霖舉家遷上海
此外，久未行騷的羅霖，其兩個兒子及家人都有在台下打氣。她自爆是行最後一場騷，她說：「農曆年後，我哋全家移民上海，因為老公啲生意北移，我都好唔捨得香港，咁多朋友、媽咪又喺呢面，或者遲啲有適合工作我會返嚟接。」羅霖自評表現有90分，她說：「我專程去推脂、全身磨砂，近呢兩個月因為執嘢移民，成日執到凌晨4點先瞓，瘦7、8磅，胸骨就嚟可以彈結他。」
採訪：JessicaNgan
攝影：ChanShunChing