領匯（823）噚日公佈高層人事任命，做開投資銀行嘅George王國龍，獲委任首席財務總監，接替過檔思捷（330）嘅周福安。另外又請咗屈臣氏香港零售物業總監黃林惠貞做租務主管。
金融海嘯後投行冇乜生意，現年46歲嘅George加盟公營機構，日後大樹好遮蔭，未嘗唔係上佳之選。其實王國龍同特區政府淵源幾深，早喺99年，港府殺鱷後功成身退，將官股透過發售盈富基金（2800）形式上市，當時任職JF資產管理嘅George，就係聯席保薦人嘅代表。華華仲記得，佢係其中一位坐喺headtable主持記者會嘅投行賓架，後嚟JF改名做摩根資產管理。加盟領匯前，王國龍係星展亞洲融資董事總經理。
識得George嘅人，都知道佢英文姓氏「Hongchoy」好特別，華華依稀記得，有次飯局佢解釋過，話先祖輩當年移居香港，大抵入境官員唔多熟華人姓氏譯法，夾硬將「王」氏同傳統中國名字「旺財」結合聯想，創出「Hongchoy」譯法，世代相傳，就成為佢哋家族獨特標記。